A nosa historia

A orixe da Banda de Gaitas e Danzas de O Irixo, remóntase aos anos 80, cando se funda baixo a dirección da Asociación Cultural Acadi, no concello de O Irixo. Co paso dos anos e a inactividade da Asociación Cultural, é o Concello de O Irixo o que decide facerse cargo da banda de gaitas.

Nos anos 90, a agrupación musical atópase nunha época de esplendor, chegando a viaxar a Arxentina, Francia e Suíza, actuación na cal representa a España no Festival Internacional de Folclore. En paralelo participa na Liga Galega de Bandas de Gaitas, acadando o segundo posto en segunda división.

Posteriormente destacan numerosas actuacións no País Vasco e na Romaría Etnográfica Raigame, de Vilanova dos Infantes.

Tras un período de declive, é no verán do ano 2017 cando os últimos cinco compoñentes da agrupación, toman o mando. No ano 2019 fundan a Asociación de Gaiteiros do Irixo e dende entón a escola non deixa de medrar, incrementando o número de alumnos en cada novo inicio de curso lectivo, convertíndose así nunha das entidades máis numerosas do Concello de O Irixo.